10 ޑިސެންބަރު 2018 | ހޯމަ | 01 މުލަ
03 ރަބީޢުލްއާޚިރު 1440
ފަތިސް 04:43
އިރުއަރާ 06:00
މެންދުރު 12:03
އަސްރު 15:23
މަޣްރިބް 17:57
އިޝާ 19:14

ރައީސް ޔާމީން

ކޮރަޕްޝަންގެ އެއްވެސް މައްސަލައެއް ސާބިތުނުކުރެވޭނެ: ރައީސް ޔާމީން

  • މައްސަލާގައި ސުވާލުކޮށްފިނަމަ ޖަވާބުދާރީ ވާނަން
  • އެމްއެމްޕީއާރްސީގެ ހިޔާނާތަކީ އެމަނިކުފާނާއި ގުޅުން ހުރި މައްސަލައެއް ނޫން ކަމަށް ވިދާޅުވި
  • ރަށްތަކުން ދައުލަތަށް ވަންނަން ޖެހޭ ފައިސާ ނުވަންނަ މައްސަލަ ކުރީގެ އޭޖީ ނިޔާޒު ވިދާޅުވެފައެއް ނުވޭ
އަމްނާ އިމާދު | @amnabinthimad

| 7 ޑިސެންބަރު 2018 | ހުކުރު 00:01 | |

މަގުބޫލް

  1. މަޖިލީހުގެ ތިން މެމްބަރުން ފިޔާވާ ހުރިހާ މެމްބަރުން ފައިސާގައި ހިފި: ނާނީ
  2. އިމިގްރޭޝަނަށް އެފްއޭ ފަޔާޒް؟
  3. ކެޑޭޓުގައި އުޅުމަކީ މުހިންމު ވަޒީފާތަކަށް ހުޅުވޭ ދޮރެއް: އެޑިއުކޭޝަން މިނިސްޓަރ
  4. މިސްރުގެ އަހުރާމެއްގެ މަތީގައި ބަރަހަނާ ފޮޓޯނެގި ދެމަފިރިއެއްގެ މައްސަލަ ބަލަނީ
  5. އެމްއެމްޕީއާރުސީން ކުއްޔަށް ދިން ރަށްތަކުގެ އެގްރިމެންޓް ފައިނަލް ކުރައްވަނީ ރައީސް ޔާމިން: ޒިޔަތު
  6. މަހުލޫފް ރާޅާއެޅުންތެރިންނާއި ބައްދަލުކުރަން ރާޅުގަނޑަށް!
  7. ޔޫއެންޕީގެ ލީޑަރުކަމުން ރަނިލް އިސްތިއުފާ ދެއްވުމަށް ގޮވާލައިފި
  8. އިންޓަނެޓްގެ އަގު ހެޔޮ ކުރުމަށް މަޝްވަރާ ކުރަނީ


ކުރީގެ ރައީސް ޔާމީން ނޫސްވެރިންގެ ބައްދަލުވުމުގައި ވާހަކަދައްކަވަނީ -- ފޮޓޯ: ރާއްޖެ އެމްވީ

ކުރީގެ ރައީސް އަބްދުﷲ ޔާމީންގެ މައްޗަށް އެމްއެމްޕީއާރްސީ މެދުވެރިކޮށް ހިންގި ކޮރަޕްޝަންގެ އެއްވެސް މައްސަލައެއް ސާބިތުނުކުރެވޭނެ ކަމަށް އެމަނިކުފާނު ވިދާޅުވެއްޖެއެވެ.

ބުރާސްފަތި ދުވަހުގެ ރޭ ޕީޕީއެމުން ބޭއްވި ނޫސްވެރިންގެ ބައްދަލުވުމެއްގައި ރައީސް ޔާމީން ވިދާޅުވީ އެމްއެމްޕީއާރްސީގެ ހިޔާނާތުގެ މައްސަލާގައި ތަހުގީގު ކުރާ ބަޔަކު އެމަނިކުފާނާއި ސުވާލުކުރައްވަން ބޭނުންފުޅުވާނަމަ ސުވާލު ވެސް ކުރައްވަންވީ ކަމަށެވެ. އަދި އެމައްސަލައަށް އެމަނިކުފާނު ޖަވާބުދާރީވާނެ ކަމަށް ޔާމީން ވިދާޅުވިއެވެ.

ރައީސް ޔާމީން ވިދާޅުވީ އެމްއެމްޕީއާރްސީގެ ހިޔާނާތުގެ މައްސަލައެއް އެމަނިކުފާނުގެ މައްޗަށް ސާބިތުނުކުރެވޭނެ ކަމަށާއި، އެއީ އެމަނިކުފާނާއި ގުޅުން ހުރި މައްސަލައެއް ނޫން ކަމަށެވެ.

އެމްއެމްޕީއާރްސީ މެދުވެރިކޮށް ހިންގި ކޮރަޕްޝަނުގެ އަމަލުތައް ބެލުމަށް ސަރުކާރުގެ މުއައްސަސާތަކުންނާއި ރައީސް ޔާމީން ވެސް ހުރަސް އެޅުއްވި ކަމަށް ކުރީގެ އޮޑިޓަރ ޖެނެރަލް ނިޔާޒް އިބްރާހިމް ތުހުމަތުކުރައްވާފައިވާތީ އެކަމަށް ރައްދުދެއްވާ ރައީސް ޔާމީން ވިދާޅުވީ އެމްއެމްޕީއާރްސީގެ މައްސަލަތަކުން ފެންމަތިވީ ސަރުކާރުން ރިސޯޓު ހެދުމަށް ރަށްވިއްކާފައި ދައުލަތުގެ މާލިއްޔަތަށް ވަންނަންޖެހޭ ފައިސާ ނުވަދެ، އެފައިސާ އެހެންދިމާލަކަށް ދިޔަ މައްސަލަ ކަމަށެވެ. ނަމަވެސް އެމައްސަލަ ނިޔާޒު ވިދާޅުވެފައިނުވާ ކަމަށް ރައީސް ޔާމީން ވިދާޅުވިއެވެ.

ރައީސް ޔާމީން ވިދާޅުވީ ނިޔާޒު އެމަނިކުފާނާއި ބައްދަލުކުރެއްވި ކަމަށާއި، އެމްއެމްޕީއާރްސީގެ މައްސަލަތަކުގެ ތެރެއިން ފާހަގަކުރެއްވީ އެމްއެމްޕީއާރްސީން ޑޮލަރު އެހެން މުއައްސަސާތަކަށް އެގްރިމެންޓް ހެދުމަށްފަހު ވިއްކާ މައްސަލަ ކަމަށެވެ. އެގޮތުން އެމްޕީއެލުން އެމްއެމްޕީއާރްސީއާއެކު ހަދާފައިވާ އެގްރިމެންޓްގެ ވާހަކަ ހިއްސާ ކުރެއްވި ކަމަށެވެ.

"މައްސަލައަކީ އެމްއެމްއޭއިން ބައްލަވާފައި އެހިފެހެއްޓެވޭނެ މައްސަލައެއް. ޑޮލަރު ރާއްޖޭގެ ބާޒާރުން ލިބުން ދަތިވީމަ މަނީ ޗޭންޖަސް ލައިސެންސް އޮންނަ ކޮންމެ ބަޔަކަށް ޑޮލަރު ހޯދޭނެ. އެމްޕީއެލްގެ ބޯޑުގެ އަމިއްލަ ނިންމުމެއް އެއީ އެމްޕީއެލްގެ އެގްރިމެންޓެއް ހަދައިގެން އެމްއެމްޕީއާރްސީއާ އެގްރިމެންޓުން އެމުއާމަލާތް ކުރުން" ރައީސް ޔާމީން ވިދާޅުވިއެވެ.

ރައީސް ޔާމީން ވިދާޅުވީ މިއީ މައްސަލައެއް ކަމަށްވާނަމަ އޮޑިޓަރ ޖެނަރަލްގެ ހައިސިއްޔަތުން މިމައްސަލަ ބަލަންޖެހޭ ކަމަށާއި، ފުލުހުންނަށް މައްސަލަ ހުށަހަޅާގެން ކަންކަން ކުރިއަށް ގެންދިއުމަކީ އޮޑިޓަރ ޖެނަރަލްގެ ގާނޫނީ ޒިންމާއެއް ކަމަށެވެ. އަދި މިމައްސަލާގައި އެމަނިކުފާނުގެ އަރިހަށްއަންނަން ނުޖެހޭ ކަމަށް ވެސް ރައީސް ޔާމީން ވިދާޅުވިއެވެ.

ދައުލަތުގެ މުއައްސަސާއަކުން ބޮޑު ކޮރަޕްޝަނެއް ހިންގާއިރު ރައީސް ޔާމިނަށް އެނގޭނެ ކަމަށް ގިނަ ބަޔަކު ބުނަމުންދާތީ އެކަމަށް ރައްދުދެއްވާ ރައީސް ޔާމީން ވިދާޅުވީ މިކަން އެނގުނު ހިސާބުން ފިޔަވަޅުއެޅުއްވި ކަމަށާއި، ފިޔަވަޅު އެޅުއްވީ އެމަނިކުފާނު ކަމަށެވެ. އަދި ރައީސް އޮފީހުން މިމައްސަލާގައި ކަންކަން ކުރެއްވީ އެމަނިކުފާނުގެ އޯޑަރަށް ކަމަށާއި، އެހެން އެއްވެސް މުއައްސަސާއަކުން މިމައްސަލަ ބަލާފައިނުވާ ކަމަށް ރައީސް ޔާމީން ވިދާޅުވިއެވެ. 

"އެހެންވީމަ ރައީސް އަށް އޭނގެ ފައިދާތަކެއް ލިބެ ރައީސް އަށް އެނގޭ ކަންތައްތަކެއް ކީއްކުރަންތޯ ރައީސް ފިޔަވަޅު އަޅުއްވަންވީ. އެހެންވީމަ ތިހެން ހުރި ތަހުގީގުތައް ހަމަ ކުރަންވީ. މިހާރު ވެސް އޭސީސީއަށް ހުންނާނެ ތަހުގީގު ކުރެވިފަ. އެމްއެމްޕީއާރްސީގަ ހަމަ ވަރަށް ގިނަ މައްސަލަތައް ހުންނާނެ އެސީސީއަށް ތަހުގީގު ކުރެވިފަ. އަދި މިހާތަނަށް އަޅުގަނޑުމެންނަށް ލަފާ ކުރެވޭ އެންމެ އެކިޔުރޭޓް އަދަދެއް، އެމްއެމްޕީއާރްސީން ގެއްލުނު ކަމަށް މިބެލޭ ފައިސާގެ އަދަދަކީ އެންމެ އެކިޔުރޭޓް އަދަދެއް ވެސް މިހާތަނަށް ވިދާޅުވެފަ އޮންނާނީ އޭސީސީއިން." ރައީސް ޔާމީން ވިދާޅުވިއެވެ.

ރައީސް ޔާމީން ވިދާޅުވީ އެމްއެމްޕީއާރްސީގެ މައްސަލަ ދިމާވެގެން މިއުޅޭ މައްސަލާގެ ވާހަކަތައް ނުދައްކަވާ އެހެނިހެން މައްސަލަތަކުގެ ވާހަކަތަކުގެ ދެއްކެވުމަށްފަހު އޮޑިޓަރ ޖެނަރަލްގެ މަގާމުން އިސްތިއުފާ ދެއްވީ ކަމަށާއި، ޒިންމާ އެއްވެސް ފަރާތަކުން ނަގާފައިނުވާ ކަމަށެވެ. އަދި މިސަރުކާރުން މިމައްސަލަ ތަހުގީގު ކުރައްވާނަމަ ފުރިހަމަ އެއްބާރުލުންދޭނެ ކަމަށާއި، އެމަނިކުފާނުގެ މައްޗަށް ކޮރަޕްޝަން އެއްވެސް ކަމެއް ސާބިތުނުކުރެވޭނެ ކަމަށް ތަކުރާރުކޮށް ރައީސް ޔާމީން ވިދާޅުވިއެވެ. 

އެންމެ ފަހުން އަޕްޑޭޓް ކުރީ: 4 ދުވަަސް ކުރިން | ރިވިއު ކުރީ: އަބުދުﷲ ނަސީރު އިބްރާހިމް

ޚަބަރެއް ނުވަތަ މައުލޫމާތެއް ރާއްޖެއެމްވީ އަށް ދެއްވުމަށް [email protected] އަށް އީމެއިލް ކުރައްވާ ނުވަތަ 9110099 ނަންބަރަށް ގުޅުއްވާ.


އެންމެ ފަހުގެ


މި ލިޔުން ކިޔާލުމުން


އަންތަރީސް ވެއްޖެ

އުފާ ވެއްޖެ

ދެރަ ވެއްޖެ

ރުޅި ގަދަ ވެއްޖެ

މޮޔަވެއްޖެ

ދެން އަތްޖަހާ


ކޮމެންޓް